Я НЕ ПРАДАМ БАЦЬКОЎСКІ ДОМ

Подробности Категория: Вершы аб родным крае

Я НЕ ПРАДАМ БАЦЬКОЎСКІ ДОМ

Мой дом не апусцеў.

        У ім

Зіняць –

      па радыё –

       куранты.

На дроце –

          тоўстым і тугім –

Пялёнкі сушаць кватаранты.

Квітнее ліпа пад акном,

Шапоча яблыня ля тыну.

Грыміць ля студні дзед вядром:

-Ты дом прадай –

   купі машыну!

Кручу ў адказ я галавой.

Я не прывык жыць у раскошы –

І не змагу дом родны свой

Прадаць ні за якія грошы.

Я не прадам нікому дом,

Дзе ўслон быў часткай інтэр’ера.

Дзе над абедзенным сталом

Вісела «Тайная вячэра».

Я ў гэтым доме вырастаў

І без яго нагадваць буду,

Калі б сюды ні завітаў,

Бяздомка брыдкага, прыблуду.

Квітнее ліпа пад акном,

Шапоча яблыня ля тыну…

І мне прадаць бацькоўскі дом,

Нібы прадаць сваю Айчыну.